Kriti Sanon Rakhi Ad Controversy : ਬਾਲੀਵੁੱਡ ਅਦਾਕਾਰਾ ਅਤੇ ਸਾਂਸਦ ਕੰਗਨਾ ਰਣੌਤ ਇੱਕ ਵਾਰ ਫਿਰ ਆਪਣੇ ਬਿਆਨ ਨੂੰ ਲੈ ਕੇ ਚਰਚਾ ਵਿੱਚ ਹੈ। ਇਸ ਵਾਰ ਉਨ੍ਹਾਂ ਨੇ ਅਦਾਕਾਰਾ ਕ੍ਰਿਤੀ ਸੈਨਨ ਦੇ ਰੱਖੜੀ ਨਾਲ ਜੁੜੇ ਇੱਕ ਇਸ਼ਤਿਹਾਰ ’ਤੇ ਸਵਾਲ ਖੜ੍ਹੇ ਕੀਤੇ ਹਨ। ਕੰਗਨਾ ਨੇ ਇਸ਼ਤਿਹਾਰ ਵਿੱਚ ਕ੍ਰਿਤੀ ਦੇ ਪਹਿਰਾਵੇ ਨੂੰ ਲੈ ਕੇ ਆਪਣੀ ਨਾਰਾਜ਼ਗੀ ਜ਼ਾਹਰ ਕੀਤੀ ਅਤੇ ਪੁੱਛਿਆ ਕਿ ਰੱਖੜੀ ਵਰਗੇ ਤਿਉਹਾਰ ਮੌਕੇ ਅਜਿਹਾ ਪਹਿਰਾਵਾ ਕਿਉਂ ਚੁਣਿਆ ਗਿਆ।
ਰੱਖੜੀ ਦਾ ਤਿਉਹਾਰ 28 ਅਗਸਤ ਨੂੰ ਮਨਾਇਆ ਜਾਣਾ ਹੈ ਅਤੇ ਇਸੇ ਦਰਮਿਆਨ ਕ੍ਰਿਤੀ ਸੈਨਨ ਦਾ ਇੱਕ ਵਿਗਿਆਪਨ ਸਾਹਮਣੇ ਆਇਆ ਹੈ। ਇਸ ਇਸ਼ਤਿਹਾਰ ਵਿੱਚ ਕ੍ਰਿਤੀ ਬ੍ਰੇਲੇਟ-ਸਟਾਈਲ ਬਲਾਊਜ਼ ਅਤੇ ਡਰੈਪਡ ਸਕਰਟ ਪਹਿਨੀ ਨਜ਼ਰ ਆ ਰਹੀ ਹੈ। ਇਸ਼ਤਿਹਾਰ ਵਿੱਚ ਉਹ ਆਪਣੇ ਕੁੱਤੇ ਨੂੰ ਰੱਖੜੀ ਬੰਨ੍ਹਦੀ ਹੋਈ ਦਿਖਾਈ ਦਿੰਦੀ ਹੈ।ਇਸ ਇਸ਼ਤਿਹਾਰ ’ਤੇ ਪ੍ਰਤੀਕਿਰਿਆ ਦਿੰਦਿਆਂ ਕੰਗਨਾ ਰਣੌਤ ਨੇ ਆਪਣੀ ਇੰਸਟਾਗ੍ਰਾਮ ਸਟੋਰੀ ’ਤੇ ਸਵਾਲ ਚੁੱਕਿਆ। ਕੰਗਨਾ ਨੇ ਕਿਹਾ ਕਿ ਅੱਜ ਦੇ ਸਮੇਂ ਵਿੱਚ ਔਰਤਾਂ ਕੋਲ ਕੱਪੜਿਆਂ ਦੇ ਕਈ ਵਿਕਲਪ ਹਨ—ਕਾਕਟੇਲ ਡਰੈੱਸ, ਚੋਲੀ, ਜੀਨਸ, ਸਾੜੀ, ਬਿਕਨੀ ਅਤੇ ਸਲਵਾਰ ਕਮੀਜ਼ ਸਮੇਤ। ਅਜਿਹੇ ਵਿੱਚ ਉਨ੍ਹਾਂ ਨੇ ਸਵਾਲ ਕੀਤਾ ਕਿ ਰੱਖੜੀ ਦੇ ਮੌਕੇ ’ਤੇ ਬਿਕਨੀ ਜਾਂ ਅੰਡਰਗਾਰਮੈਂਟ ਵਰਗੇ ਪਹਿਰਾਵੇ ਵਿੱਚ ਭਰਾ ਨੂੰ ਰੱਖੜੀ ਕਿਉਂ ਬੰਨ੍ਹੀ ਜਾਵੇ।
ਕੰਗਨਾ ਨੇ ਇਸ਼ਤਿਹਾਰ ਨੂੰ “ਕ੍ਰੀਪੀ” ਕਰਾਰ ਦਿੰਦਿਆਂ ਕਿਹਾ ਕਿ ਇਸ ਤਰ੍ਹਾਂ ਦੇ ਤਿਉਹਾਰਾਂ ਨਾਲ ਜੁੜੇ ਇਸ਼ਤਿਹਾਰ ਬਣਾਉਂਦੇ ਸਮੇਂ ਸਟਾਈਲਿੰਗ ਅਤੇ ਮੌਕੇ ਦੀ ਮਰਿਆਦਾ ਨੂੰ ਵੀ ਧਿਆਨ ਵਿੱਚ ਰੱਖਣਾ ਚਾਹੀਦਾ ਹੈ।
ਇਸ਼ਤਿਹਾਰ ਨੂੰ ਲੈ ਕੇ ਸੋਸ਼ਲ ਮੀਡੀਆ ’ਤੇ ਚਰਚਾ
ਕੰਗਨਾ ਦੀ ਪ੍ਰਤੀਕਿਰਿਆ ਤੋਂ ਬਾਅਦ ਇਹ ਇਸ਼ਤਿਹਾਰ ਸੋਸ਼ਲ ਮੀਡੀਆ ’ਤੇ ਵੀ ਚਰਚਾ ਦਾ ਵਿਸ਼ਾ ਬਣ ਗਿਆ। ਕੁਝ ਯੂਜ਼ਰਾਂ ਨੇ ਕ੍ਰਿਤੀ ਦੇ ਪਹਿਰਾਵੇ ’ਤੇ ਸਵਾਲ ਚੁੱਕੇ, ਜਦਕਿ ਕੁਝ ਲੋਕਾਂ ਨੇ ਇਸ ਨੂੰ ਸਿਰਫ਼ ਇੱਕ ਆਧੁਨਿਕ ਵਿਗਿਆਪਨ ਵਜੋਂ ਦੇਖਿਆ।ਕੁਝ ਸੋਸ਼ਲ ਮੀਡੀਆ ਯੂਜ਼ਰਾਂ ਨੇ ਇਸ ਗੱਲ ’ਤੇ ਵੀ ਇਤਰਾਜ਼ ਜਤਾਇਆ ਕਿ ਰੱਖੜੀ ਵਰਗੇ ਰਵਾਇਤੀ ਤਿਉਹਾਰ ਨੂੰ ਇਸ਼ਤਿਹਾਰ ਵਿੱਚ ਕਿਵੇਂ ਪੇਸ਼ ਕੀਤਾ ਗਿਆ ਹੈ। ਹਾਲਾਂਕਿ, ਇਸ ਪੂਰੇ ਮਾਮਲੇ ਵਿੱਚ ਵੱਖ-ਵੱਖ ਲੋਕਾਂ ਦੀ ਆਪਣੀ-ਆਪਣੀ ਰਾਏ ਸਾਹਮਣੇ ਆ ਰਹੀ ਹੈ।
ਕ੍ਰਿਤੀ ਸੈਨਨ ਅਤੇ ਕੰਗਨਾ ਰਣੌਤ ਦੀ ਪ੍ਰੋਫੈਸ਼ਨਲ ਲਾਈਫ
ਕ੍ਰਿਤੀ ਸੈਨਨ ਪਿਛਲੇ ਸਮੇਂ ਦੌਰਾਨ ਕਈ ਵੱਡੀਆਂ ਫਿਲਮਾਂ ਵਿੱਚ ਨਜ਼ਰ ਆ ਚੁੱਕੀ ਹੈ। ਹਾਲ ਹੀ ਵਿੱਚ ਉਹ ‘ਕਾਕਟੇਲ 2’ ਵਿੱਚ ਸ਼ਾਹਿਦ ਕਪੂਰ ਸਮੇਤ ਹੋਰ ਕਲਾਕਾਰਾਂ ਨਾਲ ਦਿਖਾਈ ਦਿੱਤੀ ਸੀ।
ਦੂਜੇ ਪਾਸੇ ਕੰਗਨਾ ਰਣੌਤ ਅਦਾਕਾਰੀ ਦੇ ਨਾਲ-ਨਾਲ ਰਾਜਨੀਤੀ ਵਿੱਚ ਵੀ ਸਰਗਰਮ ਹਨ। ਉਹ ਹਾਲ ਹੀ ਵਿੱਚ ‘ਭਾਰਤ ਭਾਗਿਆ ਵਿਧਾਤਾ’ ਨਾਲ ਜੁੜੀ ਹੋਈ ਸੀ, ਜਿਸ ਵਿੱਚ ਉਨ੍ਹਾਂ ਨੇ ਨਰਸ ਦੀ ਭੂਮਿਕਾ ਨਿਭਾਈ। ਫਿਲਮ ਦੀ ਕਹਾਣੀ 26/11 ਹਮਲਿਆਂ ਦੌਰਾਨ ਹਸਪਤਾਲ ਦੇ ਸਟਾਫ ਵੱਲੋਂ ਲੋਕਾਂ ਨੂੰ ਬਚਾਉਣ ਦੀ ਕੋਸ਼ਿਸ਼ ’ਤੇ ਆਧਾਰਿਤ ਦੱਸੀ ਗਈ ਹੈ।
ਫਿਲਹਾਲ ਕ੍ਰਿਤੀ ਸੈਨਨ ਦੇ ਰੱਖੜੀ ਇਸ਼ਤਿਹਾਰ ’ਤੇ ਕੰਗਨਾ ਰਣੌਤ ਦੀ ਇਹ ਟਿੱਪਣੀ ਸੋਸ਼ਲ ਮੀਡੀਆ ’ਤੇ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਹੁਣ ਦੇਖਣਾ ਹੋਵੇਗਾ ਕਿ ਕ੍ਰਿਤੀ ਜਾਂ ਇਸ਼ਤਿਹਾਰ ਬਣਾਉਣ ਵਾਲੀ ਕੰਪਨੀ ਵੱਲੋਂ ਇਸ ਵਿਵਾਦ ’ਤੇ ਕੋਈ ਪ੍ਰਤੀਕਿਰਿਆ ਦਿੱਤੀ ਜਾਂਦੀ ਹੈ ਜਾਂ ਨਹੀਂ।
